ਬਰੈਂਪਟਨ- ਕੈਨੇਡਾ ਦੀ ਪੀਲ ਪੁਲਸ ਨੇ ਓਂਟਾਰੀਓ ਦੇ ਸ਼ਰਾਬ ਦੇ ਠੇਕਿਆਂ ਤੋਂ ਤਿੰਨ ਲੱਖ ਡਾਲਰ ਦੇ ਮੁੱਲ ਦੀ ਕਥਿਤ ਸ਼ਰਾਬ ਚੋਰੀ ਕਰਨ ਦੇ ਇਲਜ਼ਾਮਾਂ ਹੇਠ ਬਰੈਂਪਟਨ ਨਿਵਾਸੀ ਦੋ ਜਣੇ ਗ੍ਰਿਫਤਾਰ ਕੀਤੇ ਹਨ । ਪੁਲਸ ਵੱਲੋਂ ਫੜ੍ਹੇ ਗਏ ਮੁਲਜ਼ਮਾਂ ਦੀ ਸ਼ਨਾਖਤ 29 ਸਾਲਾ ਸਿਮਰਪ੍ਰੀਤ ਸਿੰਘ ਅਤੇ 25 ਸਾਲਾ ਅਨੁਜ ਕੁਮਾਰ ਵਜੋਂ ਹੋਈ ਹੈ। ਪੀਲ ਪੁਲਸ ਪਿਛਲੇ ਕਈ ਹਫ਼ਤਿਆਂ ਤੋਂ ਮੁਲਜ਼ਮਾਂ ਦੀ ਪੈੜ ਨੱਪਦੀ ਆ ਰਹੀ ਸੀ । ਪੁਲਸ ਵੱਲੋਂ ਮੁਲਜ਼ਮਾਂ ਨੂੰ ਕਾਬੂ ਕਰਨ ਲਈ ਸਰਚ ਵਾਰੰਟ ਵੀ ਜਾਰੀ ਕੀਤੇ ਗਏ ਸਨ ।
ਪੁਲਸ ਵੱਲੋਂ ਗ੍ਰਿਫ਼ਤਾਰ ਕੀਤੇ ਗਏ ਦੋਵੇਂ ਮੁਲਜ਼ਮਾਂ ਉੱਪਰ ਚੋਰੀ ਅਤੇ ਅਪਰਾਧਾਂ ਜ਼ਰੀਏ ਹਾਸਲ ਕੀਤੀਆਂ ਵਸਤਾਂ ਕਬਜ਼ੇ ਵਿੱਚ ਰੱਖਣ ਸਮੇਤ ਕੁੱਲ 35 ਇਲਜ਼ਾਮ ਆਇਦ ਕੀਤੇ ਗਏ ਹਨ ।
ਅਦਾਲਤੀ ਸੁਣਵਾਈ ਹੋਣ ਤੱਕ ਦੋਵੇਂ ਮੁਲਜ਼ਮ ਪੁਲਸ ਦੀ ਗ੍ਰਿਫ਼ਤ ਵਿੱਚ ਰਹਿਣਗੇ । ਪੁਲਸ ਨੂੰ ਇਸ ਮਾਮਲੇ ਵਿੱਚ ਹੋਰ ਗ੍ਰਿਫ਼ਤਾਰੀਆਂ ਹੋਣ ਦੀ ਵੀ ਸੰਭਾਵਨਾ ਹੈ ।