‘ਦਲੇਰੀ ਕਦੇ ਇਹ ਨਹੀਂ ਪੁੱਛਦੀ ਕਿ ਪਥਰੀਲੀ ਕੰਧ ਕਿੰਨੀ ਉੱਚੀ ਹੈ’। ਪਹਿਲੀ ਜਮਾਤ ਵਿਚ ਪੜ੍ਹਦੇ ਤੇਗਬੀਰ ਸਿੰਘ ਨੇ ਅਜਿਹਾ ਸੱਚ ਕਰ ਦਿਖਾਇਆ ਹੈ । ਪੰਜਾਬ ਦੇ ਰੂਪਨਗਰ ਜ਼ਿਲ੍ਹੇ ਦੇ ਤੇਗਵੀਰ ਸਿੰਘ ਨੇ 5 ਸਾਲ ਦੀ ਛੋਟੀ ਉਮਰ ਵਿਚ ਮਾਊਂਟ ਐਵਰੈਸਟ ਬੇਸ ਕੈਂਪ ਨੂੰ ਸਰ ਕਰ ਲਿਆ ਹੈ। ਇਸ ਤਰ੍ਹਾਂ ਉਹ ਪੰਜਾਬ ਦਾ ਸਭ ਤੋਂ ਘੱਟ ਉਮਰ ਦਾ ਪਰਬਤਾਰੋਹੀ ਬਣ ਗਿਆ ਹੈ। ਉਸ ਨੇ 9 ਅਪ੍ਰੈਲ ਨੂੰ ਐਵਰੈਸਟ ਬੇਸ ਕੈਂਪ ਤਕ ਦਾ ਟ੍ਰੈਕ ਸ਼ੁਰੂ ਕੀਤਾ ਅਤੇ 17 ਅਪ੍ਰੈਲ, 2024 ਨੂੰ ਇਸ ਤਕ ਪਹੁੰਚਣ ਲਈ ਸਾਰਾ ਬਿਖਮ ਪੈਂਡਾ ਪੈਦਲ ਚੱਲਿਆ। ਐਵਰੈਸਟ ਬੇਸ ਕੈਂਪ 5364 ਮੀਟਰ ਦੀ ਉਚਾਈ ’ਤੇ ਸਥਿਤ ਹੈ ਜਿੱਥੇ ਘੱਟ ਆਕਸੀਜਨ ਕਾਰਨ ਵੱਡਿਆਂ ਵੱਡਿਆਂ ਦਾ ਵੀ ਸਾਹ ਫੁੱਲਣ ਲੱਗਦਾ ਹੈ । ਇੱਥੇ ਅਪ੍ਰੈਲ ਮਹੀਨੇ ’ਚ ਆਮ ਤਾਪਮਾਨ ਮਨਫੀ 12 ਡਿਗਰੀ ਸੈਲਸੀਅਸ ਹੁੰਦਾ ਹੈ। ਤੇਗਬੀਰ ਦੇ ਨਾਮ ਇਹ ਸਫਲਤਾ ਸੌਖਿਆਂ ਹੀ ਨਹੀਂ ਲੱਗੀ। ਉਸਨੇ ਇਸ ਦੀ ਤਿਆਰੀ ਲਗਭਗ ਡੇਢ ਸਾਲ ਪਹਿਲਾਂ ਸ਼ੁਰੂ ਕਰ ਦਿੱਤੀ ਸੀ। ਤੇਗਬੀਰ ਸਿੰਘ ਵੱਲੋਂ ਛੋਟੀ ਉਮਰ ਵਿੱਚ ਮਾਰੀ ਗਈ ਇਸ ਵੱਡੀ ਮੱਲ ਨਾਲ ਉਸਦੇ ਹਮਉਮਰ ਹੋਰਨਾ ਬੱਚਿਆਂ ਦਾ ਵੀ ਭਵਿੱਖ ਵਿੱਚ ਮਾਂਊਟ ਐਵਰੈਸਟ ਵੱਲ ਜਾਣ ਦਾ ਹੌਂਸਲਾ ਵਧੇਗਾ ।