ਸਿਟੀ ਕੌਂਸਲ ਵੱਲੋਂ ਨਿਊਟਨ ਕਮਿਊਨਟੀ ਸੈਂਟਰ ਦੇ ਨਿਰਮਾਣ ਲਈ ਠੇਕੇ ਨੂੰ ਮਨਜ਼ੂਰੀ

ਸਰੀ, ਬੀ.ਸੀ. – ਸੋਮਵਾਰ ਨੂੰ ਸਿਟੀ ਕੌਂਸਲ ਵੱਲੋਂ ਨਿਊਟਨ ਕਮਿਊਨਿਟੀ ਸੈਂਟਰ ਲਈ ਪ੍ਰੀ-ਕਨਸਟਰਕਸ਼ਨ ਅਤੇ ਡਿਜ਼ਾਈਨ ਸਰਵਿਸਿਜ਼ ਦਾ ਕਾਂਟ੍ਰੈਕਟ ਮਨਜ਼ੂਰ ਕੀਤਾ ਗਿਆ। ਇਹ ਨਵਾਂ ਸੈਂਟਰ ਨਿਊਟਨ ਦੇ ਦਿਲ ਵਿੱਚ ਇੱਕ ਸਰਗਰਮ ਅਤੇ ਸਮਾਵੇਸ਼ੀ ਕਮਿਊਨਿਟੀ ਹੱਬ ਵਜੋਂ ਵਿਕਸਤ ਕੀਤਾ ਜਾਵੇਗਾ।

ਮੇਅਰ Brenda Locke ਨੇ ਕਿਹਾ ਕਿ ਇਹ ਪ੍ਰੋਜੈਕਟ ਸਰੀ ਦੇ ਇਤਿਹਾਸ ਵਿੱਚ ਸਭ ਤੋਂ ਵੱਡੀ ਪੂੰਜੀ ਨਿਵੇਸ਼ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਇਸ ਸੈਂਟਰ ਵਿੱਚ ਮਨੋਰੰਜਨ, ਸੱਭਿਆਚਾਰਕ ਅਤੇ ਲਾਇਬ੍ਰੇਰੀ ਸੇਵਾਵਾਂ ਇਕੋ ਥਾਂ ਉਪਲਬਧ ਹੋਣਗੀਆਂ, ਜੋ ਕਮਿਊਨਿਟੀ ਦੀ ਵੱਖ-ਵੱਖਤਾ ਅਤੇ ਲੋੜਾਂ ਨੂੰ ਦਰਸਾਉਂਦੀਆਂ ਹਨ।

ਤਿੰਨ ਟੀਮਾਂ ਵਿੱਚ ਮੁਕਾਬਲੇ ਤੋਂ ਬਾਅਦ, Ventana Construction Corp. ਨੂੰ ਉਸਦੇ ਤਜਰਬੇ, ਤਕਨੀਕੀ ਪਹੁੰਚ ਅਤੇ ਵਿੱਤੀ ਪੇਸ਼ਕਸ਼ ਦੇ ਆਧਾਰ ’ਤੇ ਚੁਣਿਆ ਗਿਆ। ਪ੍ਰੀ-ਕਨਸਟਰਕਸ਼ਨ ਕਾਂਟ੍ਰੈਕਟ ਦੀ ਕੀਮਤ $9.1 ਮਿਲੀਅਨ ਹੈ।

175,000 ਵਰਗ ਫੁੱਟ ਦੇ ਇਸ ਸੈਂਟਰ ਵਿੱਚ 50 ਮੀਟਰ ਲੈਪ ਪੂਲ, ਲੀਜ਼ਰ ਪੂਲ, ਹਾਟ ਟਬ, ਸਾਊਨਾ, ਦੋ ਜਿਮਨੇਜ਼ਿਯਮ, ਫਿਟਨੈਸ ਸੈਂਟਰ, ਮਲਟੀ-ਪਰਪਜ਼ ਅਤੇ ਕਲਾ ਸਥਾਨ, ਚਾਈਲਡ ਕੇਅਰ ਏਰੀਆ ਅਤੇ 40,000 ਵਰਗ ਫੁੱਟ ਦੀ ਨਵੀਂ ਲਾਇਬ੍ਰੇਰੀ ਸ਼ਾਮਲ ਹੋਵੇਗੀ, ਜੋ ਮੌਜੂਦਾ ਨਿਊਟਨ ਸ਼ਾਖਾ ਨਾਲੋਂ ਦੋਗੁਣੀ ਵੱਡੀ ਹੋਵੇਗੀ।

ਕਿੰਗ ਜਾਰਜ ਬੂਲੇਵਾਰਡ ਦੇ ਪੂਰਬੀ ਪਾਸੇ, ਨਿਊਟਨ ਸੀਨੀਅਰਜ਼ ਸੈਂਟਰ ਦੇ ਨੇੜੇ ਸਥਿਤ ਇਹ $310.6 ਮਿਲੀਅਨ ਦਾ ਪ੍ਰੋਜੈਕਟ ਨਿਊਟਨ ਟਾਊਨ ਸੈਂਟਰ ਦੀ ਨਵੀਨੀਕਰਨ ਯੋਜਨਾ ਦਾ ਹਿੱਸਾ ਹੈ ਅਤੇ ਇਸਦੀ ਤਿਆਰੀ ਬਸੰਤ 2030 ਤੱਕ ਪੂਰੀ ਹੋਣ ਦੀ ਉਮੀਦ ਹੈ।