ਸੁਲਤਾਨਪੁਰ ਲੋਧੀ- ਚੰਡੀਗੜ ਹਵਾਈ ਅੱਡੇ ‘ਤੇ ਕੰਗਨਾਂ ਰਣੌਤ ਦੇ ਥੱਪੜ ਮਾਰਨ ਦੀ ਘਟਨਾਂ ਲਗਾਤਾਰ ਤੂਲ ਫੜਦੀ ਜਾ ਰਹੀ ਹੈ।
ਥੱਪੜ ਵੱਜਣ ਦੀ ਇਸ ਘਟਨਾਂ ਮਗਰੋਂ ਜਿੱਥੇ ਇਕ ਪਾਸੇ ਕੰਗਣਾਂ ਰਣੌਤ ਨੂੰ ਪੰਜਾਬ ਵਿੱਚ ਅੱਤਵਾਦ ਫੈਲਦਾ ਨਜ਼ਰ ਆਉਣ ਲੱਗ ਪਿਆ ਉੱਥੇ ਸੀ.ਆਈ.ਐਸ.ਐੱਫ. ਦੀ ਮੁਲਾਜ਼ਮ ਕੁਲਵਿੰਦਰ ਕੌਰ ਨੇ ਧਮਕੀਆਂ ਦੀ ਪ੍ਰਵਾਹ ਨਾ ਕਰਦੇ ਹੋਏ ਕਿਹਾ, “ਮੈਨੂੰ ਮੇਰੀ ਨੌਕਰੀ ਖੋਹਣ ਦੀ ਧਮਕੀ ਨਾ ਦਿਓ। ਮੈਂ ਇੱਕ ਕਿਸਾਨ ਦੀ ਧੀ ਹਾਂ, ਮੈਂਨੂੰ ਆਪਣੀ ਜ਼ਿੰਦਗੀ ਜਿਉਣੀ ਚੰਗੀ ਤਰਾਂ ਆਉਂਦੀ ਹੈ,ਮੇਰੇ ਅੰਦਰ ਅਜੇ ਵੀ ਇੰਨੀ ਲਿਆਕਤ ਹੈ, ਮੈਂ ਸੰਘਰਸ਼ ਕਰਕੇ ਦੁਬਾਰਾ ਨੌਕਰੀ ਹਾਸਲ ਕਰ ਸਕਦੀ ਹਾਂ।” 
ਦੇਸ ਵਿਦੇਸ਼ ਵਿੱਚ ਵੱਸਦੇ ਪੰਜਾਬੀ, ਧਾਰਮਿਕ,ਮੁਲਾਜ਼ਮ ਤੇ ਕਿਸਾਨ-ਮਜ਼ਦੂਰ ਜਥੇਬੰਦੀਆਂ ਸਮੇਤ ਲੱਖਾਂ ਲੋਕ ਕੁਲਵਿੰਦਰ ਕੌਰ ਦੇ ਹੱਕ ਵਿੱਚ ਡੱਟ ਗਏ ਹਨ । ਕਿਸਾਨ ਜਥੇਬੰਦੀਆਂ ਨੇ ਕੁਲਵਿੰਦਰ ਕੌਰ ਦੇ ਖ਼ਿਲਾਫ ਕਾਰਵਾਈ ਹੋਣ ਦੀ ਸੂਰਤ ਵਿੱਚ ਸੰਘਰਸ਼ ਵਿੱਢਣ ਦੀ ਚਿਤਾਵਨੀ ਦਿੱਤੀ ਹੈ।ਧਾਰਮਿਕ ਜਥੇਬੰਦੀਆਂ ਦੇ ਕੁਝ ਆਗੂ ਕੁਲਵਿੰਦਰ ਕੌਰ ਦੇ ਪਿੰਡ ਜਾ ਕੇ ਉਸ ਦੀ ਮਾਂ ਨੂੰ ਸਨਮਾਨ ਦੇ ਕੇ ਆਏ ਹਨ ।ਉਨ੍ਹਾਂ ਕੁਲਵਿੰਦਰ ਕੌਰ ਦੇ ਪਰਿਵਾਰ ਨੂੰ ਭਰੋਸਾ ਦਿਵਾਇਆ ਹੈ ਕਿ ਕੁਲਵਿੰਦਰ ਨੂੰ ਤੱਤੀ ਵਾਅ ਨਹੀਂ ਲੱਗਣ ਦੇਣਗੇ।
ਕਿਸਾਨ ਅੰਦੋਲਨ ਵਿੱਚ ਸ਼ਮੂਲੀਅਤ ਕਰਨ ਵਾਲੀ ਬਿਰਧ ਮਹਿੰਦਰ ਕੌਰ ਵੀ ਕੁਲਵਿੰਦਰ ਕੌਰ ਦੇ ਹੱਕ ਵਿੱਚ ਨਿੱਤਰ ਆਈ ਹੈ।
ਅਕਾਲੀ ਆਗੂ ਬਿਕਰਮ ਸਿੰਘ ਮਜੀਠੀਆ ਨੇ ਕੁਲਵਿੰਦਰ ਦੇ ਹੱਕ ਵਿੱਚ ਬੋਲਦੇ ਹੋਏ ਕੰਗਣਾਂ ਰਣੌਤ ‘ਤੇ ਵੀ ਪਰਚਾ ਦਰਜ ਕਰਨ ਦੀ ਮੰਗ ਕੀਤੀ ਹੈ।
ਕੁਲਵਿੰਦਰ ਕੌਰ ਨੇ ਆਪਣੇ ‘X’ ਅਕਾਂਊਟ ‘ਤੇ ਲਿਖਿਆ ਹੈ, “ ਮੈਂ ਉਸ ਕਿਸਾਨ ਕੌਮ ਦੀ ਧੀ ਹਾਂ ਜਿਸਨੇ ਤਾਨਾਸ਼ਾਹੀ ਨੂੰ ਕਬਰ ਵਿੱਚੋਂ ਬਾਹਰ ਕੱਡ ਕੇ ਬਦਲਾ ਲਿਆ ਸੀ,ਜਿਸਨੇ ਜੋ ਜੋ ਕੀਤਾ ਹੈ ਉਸ ਦਾ ਅਸੀਂ ਹੀ ਨਹੀਂ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਵੀ ਬਦਲਾ ਲੈਣਗੀਆਂ।”
“ਮੇਰੀ ਕਿਸਾਨ ਕੌਮ ਜੋ ਆਪਣਾ ਐਮ.ਐੱਸ.ਪੀ. ਦਾ ਹੱਕ ਮੰਗ ਰਹੀ ਹੈ , ਇਹ ਥੱਪੜ ਉਸਦੀ ਯਾਦ ਦਿਵਾਉਂਦਾ ਰਹੇਗਾ।”
ਥੱਪੜ ਕਾਂਡ ਮਗਰੋਂ ਕੁਲਵਿੰਦਰ ਨੂੰ ਨਕਦ ਇਨਾਮ ਅਤੇ ਨੌਕਰੀ ਦੀ ਪੇਸ਼ਕਸ਼ ਵੀ ਹੋਈ ਹੈ। ਮੁਹਾਲੀ ਦੇ ਇੱਕ ਕਾਰੋਬਾਰੀ ਵੱਲੋ ਇੱਕ ਲੱਖ ਅਤੇ ਕੈਨੇਡਾ ਦੇ ਰਹਿਣ ਵਾਲੇ ਇੱਕ ਗੁਰਸਿੱਖ ਆਦਮੀ ਵੱਲੋਂ ਪੰਜ ਲੱਖ ਰੁਪਏ ਦਾ ਇਨਾਮ ਦੇਣ ਦੀ ਗੱਲ ਕਹੀ ਗਈ ਹੈ। ਬਾਲੀਵੁੱਡ ਦੇ ਪ੍ਰਸਿੱਧ ਸੰਗੀਤਕਾਰ ਵਿਸ਼ਾਲ ਡਡਲਾਨੀ ਨੇ ਕੁਲਵਿੰਦਰ ਕੌਰ ਨੂੰ ਨੌਕਰੀ ਦੇਣ ਦਾ ਐਲਾਨ ਕੀਤਾ ਹੈ ।