ਮਜੀਠਾ – ਅਕਾਲੀ ਆਗੂ ਬਿਕਰਮ ਸਿੰਘ ਮਜੀਠੀਆ ਨੇ ਪੰਜਾਬ ਸਰਕਾਰ ਦੇ ਮੰਤਰੀਆਂ ‘ਤੇ ਗੰਭੀਰ ਇਲਜ਼ਾਮ ਲਗਾਏ ਹਨ। ਮਜੀਠੀਆ ਨੇ ਕਿਹਾ ਕਿ ਪਿਛਲੇ ਸਵਾ 2 ਸਾਲ ਤੋਂ ਲਗਾਤਾਰ ਦਿਨ ਰਾਤ ਰੇਤ ਮਾਫ਼ੀਆ ਵੱਲੋਂ ਮਾਈਨਿੰਗ ਕੀਤੀ ਜਾ ਰਹੀ ਹੈ,ਜਿਸ ਨਾਲ ਪੰਜਾਬ ਅਤੇ ਹਿਮਾਚਲ ਵਿਚਲਾ ਐਲਗਰਾਂ ਪੁਲ ਮਾਈਨਿੰਗ ਕਾਰਨ ਜ਼ਮੀਨ ਹੇਠਾ ਧੱਸ ਰਿਹਾ ਹੈ ਜੋ ਕਿ ਹੁਣ ਬੰਦ ਕਰ ਦਿੱਤਾ ਗਿਆ ਹੈ।
ਉਨ੍ਹਾ ਕਿਹਾ ਕਿ ਮਾਈਨਿੰਗ ਕਾਰਨ ਹੋਏ ਨੁਕਸਾਨ ਮਗਰੋਂ ਹੁਣ ਆਰਜ਼ੀ ਪੁਲ ਰਾਹੀਂ ਆਵਾਜਾਈ ਲਈ ਰਸਤਾ ਬਣਾਇਆ ਹੈ ਜਿਸ ਤੇ ਹਮੇਸ਼ਾ ਟਰੈਫਿਕ ਦੀ ਸਮੱਸਿਆ ਰਹਿੰਦੀ ਹੈ।
ਅਕਾਲੀ ਆਗੂ ਨੇ ‘ਆਪ’ ਸੁਪਰੀਮੋ ਉੱਪਰ ਉਂਗਲ ਚੁੱਕਦਿਆਂ ਕਿਹਾ, “ਹਰਜੋਤ ਬੈਂਸ ਜੀ ਦੇ ਆਕਾ ਅਰਵਿੰਦ ਕੇਜਰੀਵਾਲ ਜੀ ਵਾਅਦਾ ਤੇ 20 ਹਜ਼ਾਰ ਕਰੋੜ ਰੁਪਏ ਰੇਤ ਮਾਈਨਿੰਗ ਤੋਂ ਕਮਾ ਕੇ ਸਰਕਾਰੀ ਖਜ਼ਾਨੇ ‘ਚ ਜ਼ਮਾਂ ਕਰਨ ਦਾ ਕਰਦੇ ਸੀ ਪਰ ਹੋ ਉਸਦੇ ਉਲਟ ਰਿਹਾ ਹੈ।ਖਜ਼ਾਨੇ ‘ਚ ਪੈਸਾ ਆਉਣ ਦੀ ਬਜਾਏ ਆਪ ਦੇ ਮੰਤਰੀਆਂ ਦੀਆਂ ਜੇਬਾਂ ‘ਚ ਜਾ ਰਿਹਾ ਹੈ।”
ਅਕਾਲੀ ਆਗੂ ਨੇ ਪੰਜਾਬ ਦੇ ਮੁੱਖ ਮੰਤਰੀ ਕੋਲੋਂ ਪੰਜਾਬ ਦੇ ਕੁਦਰਤੀ ਸਰੋਤਾਂ ਦੀ ਲੁੱਟ ਅਤੇ ਜਨਤਕ ਜਾਇਦਾਦ ਨੂੰ ਨੁਕਸਾਨ ਪਹੁੰਚਾਉਣ ਵਾਲੇ ਅਜਿਹੇ ਮਾਫ਼ੀਆ ਦੀ ਜਾਂਚ ਅਤੇ ਸਮਾਜ ਵਿਰੋਧੀ ਅਨਸਰਾਂ ਖਿਲਾਫ਼ ਕਾਰਵਾਈ ਦੀ ਮੰਗ ਕੀਤੀ ਹੈ।