ਰਾਏਕੋਟ- ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਲੋਕ ਸਭਾ ਹਲਕਾ ਸ੍ਰੀ ਫ਼ਤਿਹਗੜ੍ਹ ਸਾਹਿਬ ਤੋਂ ਪਾਰਟੀ ਉਮੀਦਵਾਰ ਗੁਰਪ੍ਰੀਤ ਸਿੰਘ ਜੀ.ਪੀ. ਦੇ ਹੱਕ ‘ਚ ਰਾਏਕੋਟ ਵਿਖੇ ਪਾਰਟੀ ਵਲੰਟੀਅਰਾਂ ਨਾਲ ਰੋਡ ਸ਼ੋਅ ਕੱਢਿਆ। ਮੁੱਖ ਮੰਤਰੀ ਮਾਨ ਨੇ ਕਿਹਾ ਕਿ ਉਹ ਇਸ ਇਤਿਹਾਸਕ ਧਰਤੀ ਦੇ ਲੋਕਾਂ ਵੱਲੋਂ ਦਿੱਤੇ ਮਾਣ ਸਤਿਕਾਰ ਅਤੇ ਪਿਆਰ ਦਾ ਦਿਲੋਂ ਧੰਨਵਾਦੀ ਹੈ। “ਪੰਜਾਬ ਨੂੰ ਮੁੜ ਤੋਂ ਰੰਗਲਾ ਪੰਜਾਬ ਬਣਾਉਣ ਲਈ ਤੁਹਾਡੇ ਇਸ ਜੋਸ਼ ਤੇ ਜਜ਼ਬੇ ਨੂੰ ਸਲਾਮ। ਮੈਂ ਜਦੋਂ ਵੀ ਰਾਏਕੋਟ ਆਇਆ ਲੋਕਾਂ ਨੇ ਹਮੇਸ਼ਾ ਅਥਾਹ ਪਿਆਰ ਦਿੱਤਾ ਹੈ। ਮੈਂ ਬਹੁਤ ਕੁਝ ਸੋਚੀਂ ਬੈਠਾ ਪੰਜਾਬ ਵਾਸਤੇ,ਜਦੋਂ 4 ਜੂਨ ਨੂੰ 13-0 ਹੋ ਜਾਵੇਗਾ ਉਦੋਂ ਤੁਹਾਡੇ ਨਾਲ਼ ਮਿਲਕੇ ਅਸੀਂ ਪੰਜਾਬ ਨੂੰ ਰੰਗਲਾ ਬਣਾਵਾਂਗੇ ਤੇ ਵਿਰੋਧੀਆਂ ਦੇ ਵੀ ਮੂੰਹ ਬੰਦ ਹੋ ਜਾਣਗੇ ਜਿਹੜੇ ਸਵੇਰੇ ਉੱਠ ਕੇ ਹੀ ਗਾਲ੍ਹਾਂ ਕੱਢਣ ਲੱਗ ਜਾਂਦੇ ਨੇ।”
ਉਹਨਾਂ ਕਿਹਾ ਕਿ ਸੁਖਬੀਰ ਬਾਦਲ ਤਾਂ ਗਰਮੀਂ ਤੋਂ ਡਰਦੇ ਅਫਸਰਾਂ ਨੂੰ ਤਾਪਮਾਨ ਪੁੱਛ ਕੇ ਹੀ ਬਾਹਰ ਨਿਕਲਦੇ ਹਨ, ਜਦਕਿ ਮੈਂ ਤਾਂ 45 ਡਿਗਰੀ ਤਾਪਮਾਨ ਦੀ ਵੀ ਪਰਵਾਹ ਨਹੀਂ ਕਰਦਾ। ਭਗਵੰਤ ਮਾਨ ਨੇ ਕਿਹਾ ਕਿ ਅਸੀਂ ਬੋਰ ਵਾਲ਼ੇ ਟੋਇਆਂ ‘ਚੋਂ ਨਿਕਲ ਕੇ ਆਏ ਹਾਂ। ਇਹ ਤਾਂ ਸੁਖਬੀਰ ਬਾਦਲ ਹੋਰੀਂ ਨੇ ਜਿਹੜੇ ਜੀਪ ‘ਤੇ ਛੱਤ ਲਵਾਈ ਫ਼ਿਰਦੇ ਨੇ। ਉਹਨਾਂ ਕਿਹਾ ਕਿ ਪੰਜਾਬ ਨੂੰ ਇੱਕ ਵਾਰ ਮੁੜ ਤੋਂ ਰੰਗਲਾ ਪੰਜਾਬ ਬਣਾਂਵਾਂਗੇ।