ਗੱਡੀਆਂ ‘ਚ ਗੱਡੀਆਂ ਵੱਜੀਆਂ, ਚੈਲੇਂਜਰ ਤੇ ਟੈਸਲਾ ਦੀ ਹੋਈ ਟੱਕਰ

ਸਰੀ ਵਿੱਚ ਵਾਪਰੇ ਦੋ ਗੰਭੀਰ ਹਾਦਸਿਆਂ ਦੀ ਪੁਲਸ ਵੱਲੋਂ ਜਾਂਚ ਕੀਤੀ ਜਾ ਰਹੀ ਹੈ। ਇੱਕੋ ਰਾਤ ਵਾਪਰੀਆਂ ਦੋ ਸੜਕ ਦੁਰਘਟਨਾਵਾਂ ਵਿੱਚੋਂ ਇੱਕ ਗੱਡੀ ਦੇ ਡਰਾਈਵਰ ਨੂੰ ਜਾਨਲੇਵਾ ਸੱਟਾਂ ਲੱਗੀਆਂ ਹਨ। ਸਰੀ ਆਰ.ਸੀ.ਐਮ.ਪੀ. ਨੇ ਤਿੰਨ ਗੱਡੀਆ ਦੀ ਟੱਕਰ ਹੋਣ ਮਗਰੋਂ 68 ਐਵਨਿਊ ਅਤੇ 72 ਐਵਨਿਊ ਦੇ ਦਰਮਿਆਨ 152 ਸਟ੍ਰੀਟ ਨੂੰ ਬੰਦ ਕਰ ਦਿੱਤਾ ਸੀ ।ਹਾਦਸਾ ਵਾਪਰਨ ਮਗਰੋਂ ਇੱਕ ਵਾਹਨ ਚਾਲਕ ਮੌਕੇ ਤੋਂ ਫ਼ਰਾਰ ਹੋ ਗਿਆ, ਜਦਕਿ ਦੂਜਾ ਡਰਾਈਵਰ ਗੰਭੀਰ ਜ਼ਖ਼ਮੀ ਹਾਲਤ ਵਿੱਚ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਹੈ। ਇਸੇ ਤਰ੍ਹਾਂ ਇੱਕ ਹੋਰ ਹਾਦਸਾ 78 ਐਵਨਿਊ ਅਤੇ 82 ਐਵਨਿਊ ਦੇ ਵਿਚਕਾਰ 132 ਸਟਰੀਟ ਉੱਤੇ ਵਾਪਰਿਆ ਜਿਸ ਵਿੱਚ ਇੱਕ ਡੌਜ ਚੈਲੇਂਜਰ ਅਤੇ ਇੱਕ ਟੇਸਲਾ ਸ਼ਾਮਲ ਸਨ। ਹਾਦਸਾ ਵਾਪਰਣ ਮਗਰੋਂ ਡੌਜ ਵਿੱਚ ਸੁਆਰ ਗੱਡੀ ਛੱਡ ਕੇ ਮੌਕੇ ਤੋਂ ਫ਼ਰਾਰ ਹੋ ਗਏ ਜਦੋਂ ਕਿ ਟੈਸਲਾ ਡਰਾਈਵਰ ਨੂੰ ਗੰਭੀਰ ਸੱਟਾਂ ਲੱਗੀਆਂ ਹਨ। ਸਾਰਜੈਂਟ ਕ੍ਰਿਸ ਡੀ ਹਾਰਟ ਨੇ 132 ਵੀਂ ਸਟ੍ਰੀਟ ਨੂੰ ਕੁਝ ਘੰਟਿਆਂ ਲਈ ਬੰਦ ਕਰਨ ਦੀ ਪੁਸ਼ਟੀ ਕੀਤੀ ਪਰ ਇਸਨੂੰ ਦੁਬਾਰਾ ਖੋਲ੍ਹ ਦਿੱਤਾ ਗਿਆ ਹੈ। ਪੁਲਸ ਮੁਤਾਬਕ ਹਾਦਸਾ ਵਾਪਰਣ ਨਾਲ ਬਿਜਲੀ ਦੇ ਇੱਕ ਖੰਬੇ ਦਾ ਵੀ ਕਾਫ਼ੀ ਨੁਕਸਾਨ ਹੋਇਆ ਹੈ। ਪੁਲਸ ਵੱਲੋਂ ਗਵਾਹਾਂ ਜਾਂ ਡੈਸ਼ਕੈਮ ਫੁਟੇਜ ਵਾਲੇ ਵਿਅਕਤੀਆਂ ਨੂੰ ਸਰੀ ਆਰ.ਸੀ. ਐਮ. ਪੀ. ਨਾਲ ਸੰਪਰਕ ਕਰਨ ਲਈ ਕਿਹਾ ਗਿਆ ਹੈ।