ਪਿਛਲੇ ਦਿਨੀ ਚੋਰਾਂ ਵਲੋਂ ਸਰੀ ਦੇ ਇੱਕ ਹਿੰਦੂ ਮੰਦਰ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ। ਸ਼ਹਿਰ ਦੇ ਰਿਹਾਇਸ਼ੀ ਇਲਾਕੇ ਵਿਚ ਬਣੇ ਇਕ ਮੰਦਰ ਵਿੱਚ ਦਾਖਲ ਹੋਏ ਦੋ ਚੋਰਾਂ ਨੇ ਰਾਤ ਵੇਲੇ ਚੋਰੀ ਦੀ ਘਟਨਾ ਨੂੰ ਅੰਜ਼ਾਮ ਦਿੱਤਾ ਹੈ।
ਚੋਰੀ ਦੀ ਘਟਨਾ ਲੰਘੀ 12 ਮਾਰਚ ਨੂੰ ਵਾਪਰੀ ਦੱਸੀ ਗਈ ਹੈ। ਪੁਲਸ ਕੋਲ ਕੀਤੀ ਗਈ ਰਿਪੋਰਟ ਮੁਤਾਬਕ ਚੋਰ ਸਰੀ ਸ਼ਹਿਰ ਦੀ 123 ਸਟ੍ਰੀਟ ਅਤੇ 80 ਐਵਨਿਊ ਦੇ ਨਜ਼ਦੀਕ ਬਣੇ ਇੱਕ ਮੰਦਰ ਵਿੱਚ ਦਾਖਲ ਹੋਏ ਅਤੇ ਮੰਦਰ ਵਿਚ ਦਾਨ ਇਕੱਠਾ ਕਰਨ ਲਈ ਰੱਖੀ ਗਈ ਇੱਕ ਗੋਲਕ ਨੂੰ ਨਿਸ਼ਾਨਾ ਬਣਾਇਆ। ਪੁਲਿਸ ਨੇ ਦੋ ਸ਼ੱਕੀ ਵਿਅਕਤੀਆਂ ਦੀਆਂ ਤਸਵੀਰਾਂ ਜਾਰੀ ਕੀਤੀਆਂ ਹਨ। ਸੀ ਸੀ ਟੀਵੀ ਫੁਟੇਜ ਤੋਂ ਹਾਸਲ ਕੀਤੀਆਂ ਇਹਨਾਂ ਤਸਵੀਰਾਂ ਵਿਚ ਦੋਵਾਂ ਸ਼ੱਕੀਆਂ ਨੇ ਕਾਲੇ ਕੱਪੜੇ ਪਹਿਨੇ ਹੋਏ ਸਨ ਅਤੇ ਚਿਹਰੇ ਤੇ ਨਕਾਬ ਚੜ੍ਹਾਇਆ ਹੋਇਆ ਸੀ। ਸ਼ੱਕੀ ਵਿਅਕਤੀਆਂ ਦੀ ਉਮਰ ਵੀਹ ਤੋਂ ਤੀਹ ਸਾਲ ਦੇ ਦਰਮਿਆਨ ਦੱਸੀ ਗਈ ਹੈ। ਸਰੀ.ਆਰ.ਸੀ.ਐੱਮ.ਪੀ.ਨੇ ਸ਼ੱਕੀ ਵਿਅਕਤੀਆਂ ਦੀ ਸ਼ਨਾਖ਼ਤ ਕਰਨ ਲਈ ਲੋਕਾਂ ਤੋਂ ਸਹਿਯੋਗ ਦੀ ਮੰਗ ਕੀਤੀ ਹੈ।